ಭೂಮಿ ಹದಗೊಳಿಸುವಿಕೆ: ನೀರು ಸರಾಗವಾಗಿ ಹರಿದುಹೋಗುವ ಮಣ್ಣು ಸೂರ್ಯಕಾಂತಿಗೆ ಸೂಕ್ತ. ಬಿತ್ತನೆಗೂ ಮುನ್ನ ಭೂಮಿಯನ್ನು ಆಳವಾಗಿ ಉಳುಮೆ ಮಾಡಿ, ನಂತರ ಎರಡು ಬಾರಿ ಉಳುಮೆ ಮಾಡಬೇಕು. ಸಾಲಿನಿಂದ ಸಾಲಿಗೆ 60 ಸೆಂ.ಮೀ. ಹಾಗೂ ಬೀಜದಿಂದ ಬೀಜಕ್ಕೆ 30 ಸೆಂ.ಮೀ. ಅಂತರದಲ್ಲಿ 2–5 ಸೆಂ.ಮೀ. ಆಳದಲ್ಲಿ ಬಿತ್ತನೆ ಮಾಡಬೇಕು.

ಬೀಜೋಪಚಾರ: ಬಿತ್ತನೆಗೂ ಮುನ್ನ ಅಜಟೋಬ್ಯಾಕ್ಟರ್ ಜೈವಿಕ ಗೊಬ್ಬರ ಅಥವಾ ಶಿಫಾರಸ್ಸಿನ ಥೈರಾಮ್, ಮ್ಯಾಂಕೋಜೆಬ್, ಮೆಟಾಲಾಕ್ಸಿಲ್ ಹಾಗೂ ಇಮಿಡಾಕ್ಲೋಪ್ರಿಡ್ ಬಳಸಿ ಬೀಜೋಪಚಾರ ಮಾಡುವುದರಿಂದ ಬೀಜಜನಿತ ರೋಗ ಹಾಗೂ ಕೀಟಗಳ ನಿಯಂತ್ರಣಕ್ಕೆ ಸಹಕಾರಿಯಾಗುತ್ತದೆ.

ಗೊಬ್ಬರ ನಿರ್ವಹಣೆ: ಬಿತ್ತನೆಗೂ ಮುನ್ನ ಎಕರೆಗೆ 7.5–10 ಟನ್ ಕೊಳೆತ ಕೊಟ್ಟಿಗೆ ಗೊಬ್ಬರ ಅಥವಾ ಕಾಂಪೋಸ್ಟ್ ಹಾಕಬೇಕು. ನೀರಾವರಿ ಮತ್ತು ಮಳೆಯಾಶ್ರಿತ ಬೆಳೆಗೆ ಶಿಫಾರಸ್ಸಿನ ಪ್ರಮಾಣದಲ್ಲಿ ಯೂರಿಯಾ, ಡಿ.ಎ.ಪಿ., ಎಂ.ಒ.ಪಿ. ಹಾಗೂ ಅಗತ್ಯ ಸೂಕ್ಷ್ಮ ಪೋಷಕಾಂಶಗಳನ್ನು ನೀಡಬೇಕು.

ಸಸಿ ಮತ್ತು ನೀರು ನಿರ್ವಹಣೆ: ಬಿತ್ತನೆಯ 10–15 ದಿನಗಳೊಳಗೆ ಪ್ರತಿ ಗುಂಪಿನಲ್ಲಿ ಆರೋಗ್ಯಕರ ಒಂದು ಸಸಿಯನ್ನು ಮಾತ್ರ ಉಳಿಸಿ, ಉಳಿದವುಗಳನ್ನು ಕಿತ್ತುಹಾಕಬೇಕು. ಕೆಂಪು ಮಣ್ಣಿನಲ್ಲಿ 8–10 ದಿನಗಳಿಗೊಮ್ಮೆ ಹಾಗೂ ಕಪ್ಪು ಮಣ್ಣಿನಲ್ಲಿ 15–20 ದಿನಗಳಿಗೊಮ್ಮೆ, ಹವಾಮಾನಕ್ಕೆ ಅನುಗುಣವಾಗಿ ನೀರು ನೀಡಬೇಕು. ಕಳೆ ನಿಯಂತ್ರಣಕ್ಕೆ ಶಿಫಾರಸ್ಸಿನ ಕ್ರಮಗಳನ್ನು ಅನುಸರಿಸಬೇಕು.

ರೋಗ–ಕೀಟ ನಿರ್ವಹಣೆ: ಹಕ್ಕು ರೋಗ, ಬೂದಿ ರೋಗ, ಎಲೆಚುಕ್ಕೆ ರೋಗ ಹಾಗೂ ರಸ ಹೀರುವ ಕೀಟಗಳು ಪ್ರಮುಖ ಸಮಸ್ಯೆಗಳಾಗಿವೆ. ಶಿಫಾರಸ್ಸಿನ ಔಷಧಿ ಮತ್ತು ಬೀಜೋಪಚಾರ ಕ್ರಮಗಳನ್ನು ಅನುಸರಿಸಬೇಕು. ಸೂರ್ಯಕಾಂತಿ ಜೊತೆಗೆ ಶೇಂಗಾ, ರಾಗಿ ಅಥವಾ ತೊಗರಿಯನ್ನು ಅಂತರ ಬೆಳೆಯಾಗಿ ಬೆಳೆಯಬಹುದು.

ಕೊಯ್ಲು: ತೆನೆಯ ಹಿಂಭಾಗ ಹಳದಿ ಬಣ್ಣಕ್ಕೆ ತಿರುಗಿದಾಗ ಕೊಯ್ಲು ಮಾಡಬೇಕು. ತೆನೆಗಳನ್ನು 2–3 ದಿನ ಒಣಗಿಸಿ ನಂತರ ಒಕ್ಕಣೆ ಮಾಡಬೇಕು. ಸೂಕ್ತ ನಿರ್ವಹಣೆಯಿಂದ ಎಕರೆಗೆ ಸುಮಾರು 8–10 ಕ್ವಿಂಟಾಲ್ ಇಳುವರಿ ಪಡೆಯಬಹುದು.